اقرء وشوف بعينك

جرعت سموم غدرك ماكلتلك ليش

جرعت سموم غدرك ماكلتلك ليش********وجلمه تنرفزك مالفظت شفافي
بعد كافي:
تمرر خنجرك وتغرزه بين حشاي********وتحز بمنحري وصاعد على جتافي؟
أنه الوادي جنت لو مره امر عليه********الي اجلالاً يكوم وينتهض حافي
وأنه الكيض الجنت من اشتد على الكاع****أحولهه لسراب على البشر وافي وبعد كافي:
شجاك شغيرك؟موهدمتلي الحيل*******وماحسبت ترحل عني وتجافي
كمر آنه وطفيت بيوم من جفيت***********وكلي النفع شنهو من الكمر طافي؟
زرعتك ورده بضلوعي وسكيتك شوكـ*****وماجنت اعتقد تنكلب صفصافي
وشلت الروح الك باقة ورد ياصاح*******وانطيتك كَلب مابيه دغش صافي
ولأن طبعك حقود وتكره الحبوك*********شكَكت الكَلب وانطيتني غلافي
وبعد كافي الغصص ماأحمل الطعنات*****مايحمل بعد من الصبر سافي
أنه العالي جنت راسي على راس الغيم******من طبع الجبل ماذلت جتافي
وأكلك هاك روحي واخذ فص العين********تهز ايدك عليه تكلي متعافي!!!!!!
طبع ماي البحر لو هب عليه الريح*******يضل جدامه يركض روجه وي روجه
وأنا بوجه النوايب صرح ماأنهار ******وبحر مو ماي سم ماتكدر تفوجه
عرفتك مو وفي وطبعك طبع ثعبان*****ماعندك حجايه وقصتك عوجه
وأنه الكَلبي فطير ورايي واحد دوم *****مو مثلك أغير كل وكت موجه
الخيل بلا سرج ماتفع الخيال*******ومااحبذ المهره الموش مسروجه
الشجر عالي صدكـ بس ينتهي بلحظات*****اذا الماي انكَطع مايوصل عروجه